2Ti 3 | BJR | STEP | Óo Timooti anée maa-ufána áaqoo íria. Taikára áukuana mandá áukuana afeeka aukuana máriannoo.

2 Timothy 3

Pauroofa taikára aukuanara Timootina qímaminau.

1 Óo Timooti anée maa-ufána áaqoo íria. Taikára áukuana mandá áukuana afeeka aukuana máriannoo. 2 Mi-aukuanná mi-kamúqoo faiqí náriara kai írifaranoo káaqa aináinara rímarifaranoo, náriara firaaqóo ufa qímarifaranoo, firaaqóo náriara nári nimooqímarifaranoo, misá mandúfa faiqí ánaasee qímannimi márifaranoo, misá nári nínausa níkausa ufa rukíeefaranoo, misá nímira ainainara sía dúfi dúfi qifáranoo kai máreefaranoo, sía Ánutunara írifaranoo mána mána káimmifaranoo. 3 Sía faiqí ánaasee reendeenáma nímaqeefaranoo. Sía faiqí ánaasee nífaueefáranoo. Misá moosára múnuqi míniqifáranoo. Káaqa faiqí nárimarisa káasau fainiara foora káaqa faiqí nárímarifaranoo. Misá andeeqárausara fídiaqaammifaranoo. Misá káaqa faiqíara ueeqée maríasa misá írirana síaisa káqi minakí rakéemasee fímariasa misá káaqa nári nimooqíqa nári núqu uqéeree maríasa. Misá níqaara rée mari ainainnara kai ríqa Ánutunara sía rifáranoo. 5 Misá amaana ufa sía írifaranoo nipatakái qumáreefaranoo, ánoona ámuqusakinaana sía qumáreefaranoo. Timooti anée miqí maríasara eeráiramándee níanai mária.

6 Misákiqari akaqá fasiqauqa náriqa únna amaana ufa qianéera fúrufari maría anaaseesa mandóosana máree marú anaaseesa máaqaki óonureeqa únna amaana ufa qímannimiseenoo misá afapíta qumáreenoo misá firaafáikinoo márifaqa mi-irirána síai anaaseesa nári óosana óosana mandainaina nídudusaa aruqaafanoo ínnee dóo mi-maú kai fuaqée qifaqa mi-maú kai fídaqa. 7 Miqímari anaaseesa Ánutuna ufa ánoonara maqee maqee óosana óosana amaana ufaki randáidaqa sía ánoona paqúridaqa. 8 Óoqai Mooseefa Isipa máqusai Faraoona ásaukukinaana Isaraee máqannaasa idukúmaree fuanéera qufanoo Faraoona afuneé fásiqaqanda núqu Yaneesafa faqa Yambareesafa faqa miqandá Mooseena ititá amaqáqau. Máa̱ maqee mária unna amaana ufana qímariasa misá miqandá naanna ráidaqa, Ánutuna ánoona ufa ititáidaqa. Misá Ánutuna ánoona íriranara kadíqaidaqa óorudupidaqa misá mi-iriráfa kúqiara foora inóo máridanoo sía kásidanoo. 9 Oóqai Mooseena áukuana Yaneesasa Yambareesasa miqandá fúrufarirana aiqámausa qáfamasee misá ufa minnísaqau. Máa̱ maqee mária unna amaana ufana qímariasa aiqáma sía misá ufa írifara, misá fúrufarirafa akooqóo márifaqa minníseefara akaqáusa kai írifaranoo.

Pauroofa taikára naamúaqira ufa Timootina qímaminau.

10 Óo Timooti anée sía miqí maríanafa anée qiní naamúaqira ufamáu kai fímarianafa qiní óosana máree márianafa qinée fímarunnaqoo kai anée fímariananoo qinée Yísuna ánoona ufamau fímariafannana anée qíqafoonafa máriananoo Ánutuna saikásaara dáruafaqa sía rakéemasee minníseeqa reendeenámandee káqi miqóo márunana anée qíqafaananoo. Qinée faiqí ánaaseera qímuqusi máriafannana anée miná faqa qíqafoonafa máriananoo. Qinée kísaaqasaa Ánutuna aanára afeekaikírana anée qáfaananoo. 11 Qinée Ánutuna ufasáara dárirana faqa aupúrarana faqa máreemarúnana anée qáfaananoo. Qinée Antiooka máqusa faqa Ikooniumma máqusa faqa Ristara máqusa faqa mi-maqusánakiaqa fímariafanaqa misá dáriqa fímarufaqa firaaqóo aupúraqa fímariqiafana. Anée minára faqa írimariananoo. Karaambáiqa fannoo mi-ainainnákinaana qiní asumu mara quqásoofaqa máridaqa.

12 Aiqáma maqásaa qaraasa ásauku mundíranasaa írirana rusíseeqa miqóoqari Ánutuna andeeqára óosana máraifaqa nárírana aupúrarana máreefaranoo. 13 Mandóosana máree maríasa faqa únnaqi maría fasiqausa faqa nári mandóosana máraqa fídaqa ootúpaqa fídaqa miqíqa fífi ífaqa firaanáikifaranoo. Misá akaqáusa níkaru qiafaqa kafáa misá quándaki nári faqa níkaru qifaranoo. 14 Óo Timooti anée sía misá naanna réemariananoo. Qinée Ánutuna ánoona úfa aní aamúaqíafannana ámiqimmandee qumároonnana mi-maú kai ámiqimasee fúa. Anée yánasaaqari fee Ánutunaindaraa ufa írira óosana máreenanee. Dóo miqíkaimmásee mi-fasiqáfa indée kai ínana náaru náaru miqí kai ía. 15 Óo Timooti anée ánaaqisaa Ánutuna náaquqara ákarakinaa ufa írimarianafa máriananoo anée minára faqa íria sía aunúa. Mi-naaquqara akararufáfa asumu márira írirana aní ámiannoo. Mi-asumu mariráfa ásauku mundíranaki máridanoo.

16 Ánutufa qímannimufaqa ákara rúmaqoo úfafa máridanoo Ánutuna ufa qímannimimária fasiqausa miná qumáraifanoo minakínaa úfa fannoo nári naamúaqiannoo nári áaqaranara qáoo qíannoo, nári eendaándirana andeeqáannoo nári andeeqásee fírana naamúaqiannoo. Miqí qímasee Ánutuna ufa qímannimimaria fasiqausa andeeqásee amanaikínaqa Ánutuna saiká óosana óosana uqéeraaqa.